မြန်မာပြည်အပေါ် ပိတ်ဆို့မှုအားလုံး အမေရိကန်ပြည်ထောင်စုက ရုပ်သိမ်းလိုက်ပြီ


မြန်မာပြည်အပေါ် အမေရိကန်ပြည်ထောင်စုရဲ့ စီးပွားရေးအရ ပိတ်ဆို့မှုတွေကို အမေရိကန်သမ္မတ အိုဘားမားက ရုပ်သိမ်းလိုက်ပါပြီ။

အမေရိကန်လွှတ်တော်ကို သောကြာနေ့- မနေ့ကပို့လိုက်တဲ့ အကြောင်းကြားစာမှာ သမ္မတအိုဘားမားက... မြန်မာပြည်မှာ နိုဝင်ဘာလက ကျင်းပခဲ့တဲ့ ရွေးကောက်ပွဲအပါအဝင် ဒီမိုကရေစီ ပြုပြင်ပြောင်းလဲရေးဆိုင်ရာ တိုးတက်မှုတွေကြောင့် ပိတ်ဆို့မှုတွေကိုရုပ်သိမ်းဖုိ့ ဆုံးဖြတ်လိုက်ကြောင်း ဖော်ပြထားပါတယ်။

သမ္မတအိုဘားမားရဲ့ အမိန့်အရ မြန်မာနိုင်ငံအပေါ် ပိတ်ဆို့မှုအားလုံးကို ရုပ်သိမ်းလိုက်ပြီဖြစ်တဲ့အတွက် နောက်ဆက်တွဲအဖြစ် အမေရိကန်ဘဏ္ဏာရေးဝန်ကြီးဌာနက မြန်မာနိုင်ငံနဲ့ ပတ်သက်ပြီး ပစ်မှတ်ထားပိတ်ဆုိ့ထားတဲ့ ဗိုလ်ချုပ်မှူးကြီးဟောင်းသန်းရွှေ၊ ဒုတိယဗိုလ်ချုပ်မှူးကြီးဟောင်း မောင်အေး၊ ဦးတေဇ၊ ယုဇနဦးဌေးမြင့်၊ ဇေကမ္ဘာဦးခင်ရွှေ၊ ဦးအောင်သက်မန်း၊ ဦးထွန်းမြင့်နိုင်၊ ဦးဇော်ဇော် အပါအဝင် ပိတ်ဆို့ခံထားရသူတွေနဲ့ သူတို့ရဲ့ကုမ္ပဏီတွေ အားလုံးကို SDN စာရင်းကနေ ပယ်ဖျက်လိုက်ကြောင်း မနေ့က ကြေညာခဲ့ပါတယ်။

သမ္မတအိုဘားမားက အိမ်ဖြူတော်ကို နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ပြီးခဲ့တဲ့လ လာရောက်စဉ်က မြန်မာပြည်အပေါ်ပိတ်ဆုိ့မှုတွေကို အမြန်ဆုံးရုပ်သိမ်းမှာဖြစ်ကြောင်း ပြောကြားခဲ့ပြီးနောက် အခုကြေညာချက် ထွက်လာတာဖြစ်ပါတယ်။

ပိတ်ဆို့မှုတွေကို အခုလိုရုပ်သိမ်းလိုက်ခြင်းဟာ မြန်မာပြည်သူတွေ စီးပွားရေးပိုမိုတိုးတက်အောင် ကြံဆောင်နိုင်ဖို့အတွက် မှန်ကန်တဲ့နည်းလမ်းသစ်တရပ်နဲ့ အသိအမှတ်ပြု ဆုချီးမြှင့်တာ ဖြစ်ပါတယ်လို့လည်း သမ္မတအိုဘားမားက ပြောကြားလိုက်ပါတယ်။


RFA Burmese

0 comments:

Post a Comment