♪ ''ဖေ့စ်ဘွတ်ခ်အသက် နှစ်ရက်နဲ့တစ်မနက်'' ဆောင်းပါးရှင် - ကိုညီညီ (တောင်ကြီး) ♫


ဒီဆောင်းပါးကိုရေးဖို့ အားသွင်းထားတာကြာပြီတော်တော်နဲ့ မရေးဖြစ်ခဲ့ဘူး။ ရေးပြီးတိုင်းလည်း အသက်ငွေ့ငွေ့သာရှိတဲ့ ဖေ့စ်ဘွတ်ခ်ပေါ်က အများသူငါရေးတဲ့ Status တွေရဲ့သက်တမ်းကိုသိနေတော့ တခြားအကျိုးပြုစာတွေ ဘက်ကိုသာ ရောက်ရောက်သွားခဲ့တယ်။

တလောက ကုန်သည်ဘဝတုန်းက ကျေးဇူးရှိတဲ့ အစ်ကိုတစ်ယောက်က အလည်ရောက် လာတော့ နှင်းတောင် လိုက်ပို့ဖြစ်တယ်။ ကားမောင်းနေတုန်း သူကမေးတယ် ''မင်း ဘယ်လိုစာရေးဖြစ်သွားတာလဲ'' တဲ့။၂ဝ၁၂ ခုနှစ်မှာ မြန်မာနိုင်ငံတစ်ခေါက်ပြန်တယ်။ ကိုယ်သိတဲ့ပညာ ရှာရာနည်းလမ်းတွေ၊ ကျောင်းတွေကောလိပ် အကြောင်းတွေ၊ သားသမီး ပျိုးထောင်ပုံ ပျိုးထောင်နည်းတွေ နဲ့ နေ့စဉ်ပြောစကားမတူတဲ့နယ်မြေရပ် ဝေးမှာ ငွေထုတ်ထမ်းပြီးသွားတာတောင် ဘယ်လိုရုန်းကန်ပြီး ဘဝရပ်တည်ရတယ် ဆိုတာကို (သိသလောက်တတ်သလောက် မတောက်တစ်ခေါက်) ပြောပြဖို့ကို ဘယ်သူမှ နားမထောင်ချင်ဘူး။

ဘယ်မေးခွန်းမှ မေး မယ့်သူမရှိဘူး။ သူတို့ရဲ့သားက နယူးယောက်ကတက္ကသိုလ်မှာ ဆရာဝန်လိုင်းတက်နေတာဆိုတာနဲ့ ငါ့သမီးလည်း နောက်လအမေရိကားသွား တော့မှာဆိုတာတွေပဲ နားထောင်ပြီး ပြန်လာခဲ့ရတယ်။ ဒါနဲ့ ဒီဘက်မြေ ပြန်ရောက်ပြီး နောက်တစ်နှစ်လောက်နေတော့ ကိုယ်သိထားတာတွေကို အသိပညာဖြန့်ဝေဖို့ စာရေးပြီးပြောရတာပါပဲလို့ ရှည်ရှည်ဝေးဝေး ရှင်းပြတော့ သူက ''အော် ... သိပြီ၊ ပြောချင်တာကို နားထောင်မယ့်သူမရှိလို့ စာရေးဆရာ ဖြစ်လာတာကိုး'' လို့ သုံးသပ်သွားပါတယ်။ အမှန်က ကျွန်တော်က စာရေးဆရာ မဖြစ်သေးပါဘူး။ စာတိုမုတ်စရေးတဲ့ စာရေး သားသူ တစ်ယောက်သာသာပါလို့ ပြန်ရှင်းပြမိတယ်။

မှန်ပါတယ်။ ကျွန်တော်ဟာ အဟောအပြော ကောင်းဖို့ဝေးစွ၊ စကားတစ်ခွန်းတောင် မှလေသံချောအောင် ပြောတတ်သူတစ်ယောက် မဟုတ်ပါဘူး။ ပြောတဲ့စကားတစ်ခွန်းတစ်ခွန်းကလည်း ''ကုလား ၅ ယောက် ထမ်း လာတာကမှ သူ့ထက်ပေါ့ဦးမယ်'' လို့ သုံးသပ်သူလည်း ရှိခဲ့ပါတယ်။ ဒါ့အပြင် ကုန်သည်ဘဝက ငွေရှင်ကြေး ရှင်ဆိုတော့ ဆက်ဆံရေးက ပိုဆိုးတယ်။ အပေါက်ကလည်း ကြမ်းတယ်။ ငွေလည်း ပေးဝယ်ရသေးတယ်။ ဟောက်လည်းဟောက်ငမ်းသေးတယ်လို့ ပြောသူလည်းရှိသပ။ ဒါပေမဲ့ အရောင်းအဝယ်သမားပေမို့ ဝယ်သူရဲ့ အလိုလောဘနဲ့ ဈေးကွက်ရဲ့ရနိုင်ခြေကို ဘယ်တုန်းကမှ ကျွန်တော် မျက်ခြေအပြတ်မခံခဲ့ပါဘူး။ ကဲပါလေ ... စာရေးဖြစ်လာရခြင်းဘက်ကို ပြန်သွားရအောင် ...။

ဒါနဲ့ ကျွန်တော် စာပေဟောပြောပွဲတွေကို ပြန်လွှင့်ပေးတဲ့စာမျက်နှာ တစ်ခုနဲ့ တရားလွှင့်ပေးတဲ့ စာမျက်နှာတို့ကို စလုပ်ဖြစ်တယ်။ ဒီကနေဖေ့စ် ဘွတ်ခ်ကို သင်ရတာ ၆ လလောက်ကြာ တယ်။ နောက်မှ Google မှာ Blog ဆိုတာကို စလုပ်ဖြစ်တဲ့အချိန် မြန်မာလိုရေးတဲ့ဘလော့ဂ်ပေါ်မှာ စာဖတ်သူ မှေးမှိန်ချိန်နဲ့ တည့်တည့်တိုးနေ တယ်။ ဒါကိုလည်း လေ့လာရတာ ၂ လ လောက် အကြာမှာ မှတ်မှတ်ရရ ၂ဝ၁၃ သင်္ကြန်ပြီးချိန် The Hot News Weekly က ပထမဦးဆုံးစာမူကို ဖော်ပြခံရတယ်။ ကျွန်တော် ရင်ခုန်လိုက်ရတာ။ ဇနီးကိုပြ၊ သမီးကိုပြ၊ သားကိုပါ ဖတ်ခိုင်းနဲ့ တစ်သက်လုံး ကိုယ်ရေးတဲ့စာကို ဘယ်ပုံနှိပ်ပေါ်မှာမှ မပါဖူးဘူးပဲကိုး။

ပထမဦးဆုံး အွန်လိုင်းပေါ်ကနေ ဂျာနယ်တွေဖတ်ရာက အင်တာ နက်ဂျာနယ်ကို မိတ်ဆက်တယ်။ ရက် ၂ဝ လောက်ကြာလည်း အကြောင်း ပြန်စာမလာဘူး။ ဒါနဲ့ အီးမေးလ်ပို့ ထပ်မေးတော့ စကားပြော 'တယ်' နဲ့ ရေးလို့ မထည့်ပေးနိုင်ပါဘူး၊ သတင်းစာမှာလို 'သည်' နဲ့ရေးမှ ဖော်ပြပေး နိုင်ပါမယ်တဲ့။ ဒါပေမဲ့ သူတို့ရဲ့ နောက်တိုက်ခွဲတစ်ခုကထုတ်တဲ့ ဂျာနယ်ကို ပြပေးကြည့်မယ်လို့ပြောတာ ပျောက်သွားပြန်တယ်။ ဒါနဲ့ရှိတဲ့ ဂျာနယ် အီးမေးလိပ်စာတွေ အကုန်ရှာ၊ အီးမေးလ်ပို့ပေမယ့် စာမူရောက်ရှိကြောင်း အကြောင်းပြန်တာတစ်ခါမှ မကြုံခဲ့ရဘူး။ နောက်တော့ Auto World က ကားအကြောင်း တစ်ပုဒ်ယူသုံးတယ်။ ဈေးကွက်ဂျာနယ်က ၅ ပုဒ်၊ ကုမုဒြာက ၁ ပုဒ် ယူသုံးကြတယ်။

သူတို့ဂျာနယ်မှာ ပါတယ်သာပြောတာ (က) ပါမယ်မှန်း ပယ်မယ်မှန်း ကြိုမသိရဘူး၊ (ခ) မသုံးဘူးလားလို့မေးရင် အီးမေးလ် မပြန်တော့ဘူး၊ (ဂ) ယူသုံး၊ မသုံး အတည်ပြုချင်ပေမယ့် ဘယ်လိုမှမေးလို့မရဘူး။ သူတို့ ဖြေတာက စာမူတိုက်ရဲ့ပေါ်လစီအရ ပါမယ်၊ မပါဘူးဆိုတာ ကြိုပြောလို့ မရပါဘူးတဲ့။ စာမူခ ထုတ်လို့ရမလားလို့မေးတော့ တိုက်မှာလာထုတ်ခိုင်း လိုက်ပါလို့ပြောတယ်။ စဉ်းစားကြည့်ပါဦးဗျာ။ ကိုယ့်ဆောင်းပါးတစ်ပုဒ် အရွေး ခံထားရတဲ့ စာမူတိုက်ကိုရေးခငွေ ၇,ဝဝဝ ကျပ်ရဖို့ ဘယ်သူ့ကို တက္ကစီငှားပြီး သွားယူခိုင်းရမှာလဲဆိုတာ ကျွန်တော် ရှာမရခဲ့ဘူး။

နောက်တော့ The Hot News မှာ အကြီးတန်းအယ်ဒီတာ ဖြစ်လာတဲ့ (ကွယ်လွန်သူ- နိုင်/ကျဉ်းသား) ကိုဂျော်လီထွန်းကို ဆောင်းပါး (၁၄) ပုဒ် စာငွေထုတ်ခိုင်းပြီး ရုပ်ရှင်မင်းသားဦးကျော်သူ နာမှုကူညီရေးအသင်းကို အကုန်သွားလှူခိုင်းလိုက်ပါတယ်။ နည်းနည်းစီ ယူသုံးထားတဲ့ စာမူတိုက်တွေဟာ ကျွန်တော့်ဆီ စာမူလည်း ဆက်မတောင်းသလို ကျွန်တော်လည်း မပို့ဖြစ်တော့ဘူး။ တစ်နည်းအားဖြင့် ငွေအကြောင်း ကျွန်တော်မပြောသလို သူတို့လည်း ကျွန်တော့်ကို ငွေပေးဖို့ သတိမရကြဘူး။

NetGuide ကို စာမူတိုက်နဲ့ ဆက်သွယ်ရခက်ခဲတဲ့ မကြိုက်နှစ်သက်တာတွေကို ဆွေးနွေးဖြစ်တယ်။ သူ့ဘက်ကလိုက်လျောပြီး အဲဒီကနေ ကျွန်တော့် ဆောင်းပါးတွေ ဆက်တိုက်ပါလာတယ်။ နောက်ပိုင်းမှာ ကိုမိုးသန်းချစ်က ဆက်သွယ်လာလို့ သူငယ်ချင်းတစ်ယောက်ရဲ့ဘဝမှန် ပြောပြသမျှကိုရေးထားတဲ့ 'တိုးနီရဲ့ အမေရိကန် အိပ်မက်' ကို Real Lives and Real Stories မှာ ပေးသုံးဖြစ်တယ်။ သူက မဂ္ဂဇင်းထုတ်တာ ၂ လ တစ်ခါဆိုတော့ ဆက်တိုက် ဖတ်နေသူနဲ့ အချိတ်အဆက်လိုတယ်။ ဒါကြောင့် ဖေ့စ်ဘွတ်ခ်ပေါ်တက်ပြီး ကိုးယိုးကားယား မင်းသားတက်လုပ်ရင်း အခု ဒီဘဝရောက်လာတာပါပဲ။

ကျွန်တော် ဒီအကြောင်းတွေကို မချွင်းမချန်ပြောနေရတဲ့အကြောင်းက အချက် ၂ ချက်ရှိပါတယ်။ ပထမတစ်ချက်က နိုင်ငံတကာကနေ စာရေးတယ်ဆိုတာ ငွေရဖို့ အဓိကမဟုတ်ဘူးဆိုတဲ့အချက်ပါ။ ဒါကိုဆက်ရှင်း ရရင် ကြီးကျယ်တယ်လို့ မထင်လိုက်ပါနဲ့။ စာမူတစ်ပုဒ်ရေးခရဖို့ အမေရိကားမှာ ဘယ်နှစ်နာရီမှ အလုပ်လုပ်ဖို့ မလိုပါဘူး။ ဒါပေမဲ့ ဒီစာတစ်ပုဒ်ကို လက်ပေါ်တင်ဖတ်ဖို့ အဆင့်ရောက်အောင် ရက်ပေါင်းများစွာ စဉ်းစားရ ပါတယ်။

ကျွန်တော်ပြောချင်တဲ့ ဒုတိယအချက်ကဒါပါပဲ။ စာရေးဖူးသူတိုင်း သိကြမယ်။ စာရေးတာထက် စဉ်းစားရတာ ပိုခက်တယ်ဆိုတာ။ အဲဒီလို တောင်ရောက်မြောက်ရောက် အတွေးတွေကို လက်ချောင်းလေးတွေနဲ့ မတင်ပြီး ဆောင်းပါးတစ်ပုဒ်အဖြစ် ပုံဖော်ရတာက လက်အဝင်ဆုံးပါပဲ။ ကလက်တက်တက်လည်း မဖြစ်ရဘူး၊ ရမ်းသန်း မှန်းသန်း ရေးထားတာလည်းမဖြစ်ရဘူး၊ ကြီးကျယ်ခမ်းနားပြီး အသုံးမကျတဲ့စာစုလည်း မဖြစ်ရဘူး၊ ပြောသာ ပြောလိုက်တယ် ဖတ်သူရင်မှာဘာတစ်ခုမှ အသိပညာမရသွားဘူး ဆိုတာလည်း မဖြစ်ရဘူးဆိုတဲ့ ကိုယ်ချထား တဲ့ဘောင် ကိုယ်တိုင်ဝင်ဖို့ လုပ်ရတာက စာတစ်တန်ပေတစ်တန်ပြောရရင် ''စာရေးတာဟာ အနုပညာ တစ်ခု ထက်မနိမ့်တဲ့ အားထုတ်မှုကို ပေးရပါတယ်'' လို့ ညွှန်းဆိုပါရစေ။

မည်သို့ပင်ဖြစ်စေကာမူ 'သတင်းအသက်တစ်မနက်' လို့ကြားဖူးတာကိုလည်း မေ့မရနိုင်ဘူး။ မျက်မြင်စာအုပ် - Hard Copy ဆိုလည်း မြန်မာလူငယ်တွေက ဝယ်မဖတ်ကြတော့ဘူး။ မဂ္ဂဇင်းနဲ့ ဂျာနယ်တွေက ကြော်ငြာ တွေချည်းဆိုတော့ ဖေ့စ်ဘွတ်ခ်မှာ လွတ်လပ်စွာမျှဝေရင်း ပိုက်ဆံမရတဲ့ “ Like ” များစွာကို မျှော်မှန်းမိခဲ့တယ်။ တစ်ဆက်တည်းမှာ ဖတ်သူနဲ့ရေးသူတို့ကြား ဆွေးနွေးမှုလေးတွေ ကို ဖြေကြားမိတယ်။ မသိလိုက်ဘာသာနဲ့ ကိုယ့်စာကို လူပိုဖတ်လာရေးကို ပရိုမိုးရှင်း လုပ်လာမိတယ်ပေါ့ဗျာ။ ပြီးခဲ့တဲ့ ၂ နှစ်လောက်က ပြောတာပါ။

အခုမှာတော့ ဖေ့စ်ဘွတ်ခ်ဟာ လူငယ်၊ လူကြီးအရွယ်မျိုးစုံရဲ့ 'ရင်ဖွင့် ကွင်းပြင်ကြီး' ဖြစ်လာရုံမက မနုဿပေါက် ကွဲသံတွေကို အဆုံးထိဆက် ဖတ်လို့ မရနိုင်လောက်အောင် မြင်တွေ့လာရတယ်။ အဆူအဆဲ ခံရလို့ စိတ် မညစ်နဲ့ ကိုယ့်ထက်အဖြစ်ဆိုးတဲ့ ကိစ္စတစ်ခုခုပေါ်လာရင် 'ပြီးသွား ပြန်ပြီ တစ်ကွက်'။ ကျွန်တော်ပြောချင်တာက ဒါပါပဲ။ အခုကျွန်တော့်စာကို အင်တာနက်ဖိုး အကုန်ခံပြီး မိနစ် (၂ဝ) လောက် ဖတ်ပေးနေရင်ကို ကျေးဇူးတင်လွန်းလှပြီ။ ဖေ့စ်ဘွတ်ခ်ရဲ့ အသက် ၂ ရက်နဲ့ ၁ မနက်ပဲ ရှိတာကို ကျွန်တော် သိနေမိတာကိုး။

တကယ်တော့ အမေရိကားမှာ ရုပ်ရှင်မင်းသား ရောက်လာလည်း ဒါပဲ။ အဆိုတော် ရောက်လာလည်းဒါပဲ။ တီးဝိုင်းအဖွဲ့ပညာရှင် ရောက်လာလည်း ဒါပဲ။ ဆရာဝန်ရောက်လာလည်း ထိုင်စားလို့မရပြန်ဘူး။ စာရေးဆရာ မို့လို့လည်း နာရီစားအလုပ်လုပ်ရတာပါပဲ။ ဘယ်သူ့ကိုမှ ကြီးမြတ်အောင် ချီးမြှောက်မနေကြဘူး။ ဘယ်သူကမှ ထူးခြားပြီး အထင်ကြီး နေတာမျိုး ရှိမနေကြပါဘူး။



NetGuide Journal (Every Wednesday)
https://www.facebook.com/officialnetguidejournal





<<<
အောက်ကကြော်ငြာကိုတစ်ချက်လောက်နှိပ်ခဲ့ပေးစေချင်ပါတယ်ဗျာ။ ကျွန်တော့်ကိုတစ်ဖက်တစ်လမ်းကကူညီရာရောက်ပါတယ်ဗျာ။
>>>



 
 
 
www.pyaephyo.com

0 comments:

Post a Comment